Vellukka isfiskedag i Stemmerdalen

Mugabo Musabyimana prøvar å lokka opp ein aure frå dypet

Laurdag 20. april var det duka for isfiskedag i Aurlandsfjella – «Kom deg ut dagen».  Arrangementet er eit samarbeid mellom Aurland Turlag og Aurland fjellstyre. Heile bygda var invitert til fjells, gjennom annonse i Aurlendingen og på heimesida til Aurland turlag og Aurland fjellstyre. Det vart også jobba målretta med å få med flyktningane i Aurland og Lærdal. Ein stor takk til Serif Isic, i NAV flyktningteneste, for godt bidrag i organiseringa.

Det er alltid spanande å arrangera aktivitetar i fjellet, og spesielt på vinteren. Dagen starta med snødrev og sur vind i frå nord. Då var det godt at den nyinnkjøpte lavvoen var på plass, og gav naudsynt ly til kalde fingrar. Fyr på bålpanna, varm kakao og kaffi gjorde godt.

I alt var det 40 besøkande på isfiskedagen, i tillegg til dei 4 arrangørane. Me var heldige og tok imot folk frå mange nasjonalitetar; Kongo, Ukraina, Danmark, Nederland og Tyskland.

Litt utpå dagen titta sola fram, og vinden løya. Grischka Marquart leda då an ut på isen, og jaggu debuterte han også med sitt livs fyrste fisk!

Totalt vart det fanga 2 fine aurar, den andre fisken var det Vebjørn og Nike som stod for.

Det var også høve til å prøva ski og trugar for dei som ville. Fleire, både born og vaksne, fekk testa ferdigheitene sine for fyrste gong.

Isfiskedagen vart avslutta med varm jordskokk-suppe hjå Solveig på Steinbergdalshytta.

Dette er verkeleg ein kjekk dag og me håpar å kunne gjenta suksessen neste år!

Grischka Marquart med sitt livs fyrste fisk!