Fiskedagar med skulane i Aurland – fjellet som arena for læring

Aurland fjellstyre har arrangert fiskedagar med barneskulane i Aurland sidan slutten på 1990-talet. Attendemeldingane frå elevar, skular og lærarar har vore, og er veldig positive. Ikkje sjeldan får me høyra «Dette er årets beste skuledag»!

Skulane i Aurland og Aurland fjellstyre fornya i 2023 parterskapsavtala om fjellfiske. Det er no avtala eit årleg samarbeid til og med 2028. Målet er at elevane skal få opplevingar i fjellet og større innsikt i bruk og forvaltning av fjellvatna i Aurland. Barna får vera med å trekka garn, sløya fisk og får innføring i fjellaura sin anatomi og økologi. Og ikkje minst, barna får eta fersk fjellfisk stekt på steinhelle. Eit vesentleg punkt er at barna får vera nysgjerrige, ta på, føle og oppleva. Fjellet som arena for sosial læring er også sentralt.

Visste du at aura har tenner på tunga?

Elevane vert invitert til fjells ein dag i 1., 2., 3. og 4. klasse. Når elevane går i 7. klasse vert dei invitert med på prøvefiske. Då kjem matematikken også inn i opplegget, då det er fokus på forholdet mellom vekt og lenge hjå fisken. Elevane skal rekna ut det som vert kalla kondisjonsfaktor. Når det er store fangstar, får skulane ta med fisken heim. Då vert det laga til mat på skulekjøkenet, og aure i ulike variantar vert servert på haustfesten. Fjelloppsynet er heldige og vert invitert til fest!

Fjellfiske er mange fag. Er det kanskje ikkje mat og helse og kunst og handverk i dette biletet?

Eit vesentleg moment er at desse dagane vert arrangert mange haustar etter kvarandre. Ofte opplever me ungar som ikkje vil smaka på fisken dei første åra, men så dristar dei seg kanskje til ein ørliten smak i år nummer 3 eller 4. Då kjem dei plutseleg smilande fram frå bak ein stein og vil ha meir!

Fiskedagane er gratis for skulane. Aurland fjellstyre har i mange år søkt ut midlar frå Miljødirektoratet/Fjellstyresambandet  for å dekka bussutgiftene. Arbeidsinnsatsen er sponsa av fjellstyret. I 2024 var det diverre ikkje midlar til busskostnadane gjennom dei vante kanalane. Heldigvis var Sogn sparebank positive, og sponsa bussutgiftene.

Me takkar for alle desse flotte dagane, og ser fram til nye læringseventyr i 2025!